點解你會話難揾客?


做得呢行,個個都話唔夠客,就算有客都唔會話夠,有邊個真係會串到話,我太多客啦,簽單都簽到無時間。


(亦所以,耐唔耐有人走黎問我有無客過D比佢,我都O嘴,我係有客,但真係未有耐可以多到簽唔切,教你點揾就得,俾你不勞而獲,就應該無咩道理。)


所以,有好多(應該我目測係大部分)Team頭,又會乘機講心態,話你心態夠嘅話,逢人就講保險,就人人都可以成爲你嘅客啦。如果係真,就大家唔會日日話唔夠客啦。成條街都係人,阿Team Head不如你落去表演下,爆下數俾我睇。


所以,實情係,人,同客,係兩個唔同嘅概念。對你賣嘅產品有需求,起碼有興趣,就係你嘅客,否則就只係路人甲。換言之,係唔係客,唔係客觀嘅高矮肥瘦,係主觀上你嘅產品係唔係Hit到客戶需求。


再推論落去,點解無客,因爲你雖然日日見到人,但係你嘅產品唔能夠激起呢D人嘅興趣,成爲你嘅客。極端D講,Sogo門口日日人來人往,點解唔係客,因爲你口袋裏面嘅產品(例如通街都講緊嘅MPF戶口整合)唔足夠停低D人落黎聽你Sell。如果你竪起個易拉架,話產品可以保證每一年派10%息(當然,要係真,唔係呃人),我保證成街嘅人都會停低成爲你嘅客。


正如我之前講過,做銷售,唔好自我中心,要以客戶爲中心;唔係日日話自己心態好強,而係問客戶有咩野需求。例如上星期講過嘅未出世都買得嘅危疾,如果你公司根本無呢個產品,你對住一個大住肚嘅媽媽,你根本無野可以滿足到佢想為BB買保險呢個需要,佢對你黎講,只係路人甲,起碼暫時都仲係。但對其他有呢個條款公司嘅Agent黎講,佢就係一個客。


而如果你“心態”夠,賣唔到保BB嘅保險,咪賣保媽媽嘅保險lor,起碼D無料嘅Team Head會咁叫你。呢D咪叫HardSell lor,人地成個心都係諗住個BB,你就為左自己做生意,幫唔到佢解決問題之餘,仲硬係要人地買D無需要嘅野,咪乞人憎lor。


當然,唔係話如果你有齊市場上100%產品,就可以變到人人都做到你個客,而係講緊機會率嘅問題。你諗下,而家可能你見5個客,有4個你搞唔掂,但如果你多幾個產品可以滿足到呢4個裏面其中1個,你業績就增長一倍啦。


所以,成日話無客,有好大原因,係因爲你口袋裏面嘅產品係有限公司。要根本解決唔夠客嘅困境,唔好成日賴心態,第一步應該先走出黎睇下呢個世界,擴濶你嘅眼光,你先幫到更多唔同需要嘅客戶。