加息?定唔加?


近年,好多保險同行都有做保費融資套息嘅操作,主觀上真係唔願意見到加息。我好明白,唔通你以爲我無客戶因爲加息呢件事話要睇定D先?


於是呢排,好多專業保險中介人突然分析員上身,一堆理據,話雖然美國加息(呢個否認唔到),但香港唔會跟,跟都唔會跟足。但係,主觀願望歸願望,客觀事實終歸係客觀,唔係堆砌一堆理由就可以改變現實。


例如有人話,香港資金充裕,好似上次美國加息,因爲香港銀行水浸,所以都無跟隨加息。所以今次,除非美息加到好高(有人話係4厘),否則香港唔會跟。


呢個邏輯係無錯,如果香港資金充裕,錢嘅供應多,同好多其他商品嘅情況一樣(我記得有一年荔枝大做,15蚊兩磅),價格自然受壓,即係唔會跟隨加息。如果。。。。

呢個理論,上個星期(我聽到呢番説話嘅時候)都可以算係啱,但當時已經講緊銀行資金結餘跌得好快,已經出新聞話得番2,000億,行文今日睇下,得番1,652億tim,一個星期走左成350億,你話嚴唔嚴重?


要知道,香港係無任何外匯管制,國際資金(包括我同你嘅存款)話黎就黎,話走就走(起碼暫時基本法仍然未係過時協議,仍然保障呢件事),咁多年都比人話香港係提款機,一有咩野大件事,大Master要周轉,一定係抽調香港D錢(於是股市就跌)。


(講開又講,之前筆者仲有賣基金嘅時候,都要同個客分析市場,成日聽到D九流分析員話,港股走勢可以睇強,因爲。。。因爲資金充裕,我就次次都笑出黎。D國際炒家,睇到香港有機會、當炒,就調錢入黎炒一轉,咪“資金充裕”lor。炒完,聼日話走就走,唔通抽錢走之前,要打個電話同你單聲?如果你信呢D九流分析,睇住個銀行資金結餘高就入市,聼日錢一走,你咪成手蟹貨lor。)


所以,資金充裕呢件事,從來不足恃。行文今日,資金充裕已經不再係事實(早知道我唔好懶,應該上星期就發呢編文,顯得我有先見之明),1個月HIBOR已經高見1%啦。


要繼續响加息周期賣保融,真係要落多D功夫計清楚D數比個客睇,筆者就係咁做緊。事實上,分紅保單嘅複息爆炸力,尤其係後期年份,真係好厲害,就算加息都仍然好有利潤空間,如果計清楚,你仲會發現,就算而家响加息周期開始做,都比等多幾年減返息先做黎得吸引,換言之,而家一般客戶嘅觀望態度,唔係收益最大化嘅做法。


只要你比客戶真係睇到一個好清楚嘅Excel,計曬唔同情況嘅數字,一樣可以Sell到客。但明知道加息係必然發生,都硬係揾D理由話唔係,最終只會傷害客戶對你嘅信任。