利息幾時減返?學下睇孳息曲綫


保險,嚴格上都係金融行業,雖然唔使日日睇住個市,𥄫住呢樣果樣經濟數據,但都要有少少金融常識,起碼同個客都吹到兩嘴。呢排熱門話題當然係加息,關於呢個話題,有一樣野真係要學下。


好多分析員(真係有料同臨時嘅都有)都日日預測仲會加息幾多,幾時可能會調頭減返。不過與其齋吹,不如揾一D根據,留意下美國政府債券嘅孳息曲線(Yield Curve)。


https://home.treasury.gov/resource-center/data-chart-center/interest-rates/TextView?type=daily_treasury_yield_curve&field_tdr_date_value_month=202208


如果你投資美國政府債券,當然可以賺取一個回報,包括直接每半年派一次息比你(Coupon),或者你買嘅時候係有一個折讓,到期時候,美國政府還全額比你,中間就可以賺價。總括呢兩樣收益,就可以計到一個孳息(Yield),即係你可以賺到嘅複息年回報。


唔同時間到期嘅債券,都可以計到唔同嘅利率;將呢D唔同年期利率Plot成一條曲綫,咪就係孳息曲線。咁孳息曲線有咩野用。就係開頭講,可以睇到市場對未來息率嘅一個預期。


首先,大家要認識一個概念,遠期利率(Forward Rate),即係未來一個時間點嘅利率。例如三年後,如果我買一張2年期債券,我可以收到幾多利息?亦即係呢排大家成日問嘅一個問題:3年後,利率會唔會減返。


行文今日,3年期美國政府債券孳息係3.18%(升左好多),而5年期嘅反而只係2.97%,呢個其實係一個倒掛孳息曲綫(Inverted Yield Curve),即係長年期孳息反而低過短年期孳息,唔係一個正常孳息曲綫(Normal Yield Curve)。


如果你買一個5年期債券,你可以每年得到一個複息2.97%嘅收益;或者,你可以先買一個3年期債券,賺每年3.18%先,之後再買另一個2年期債券。而市場好公平(專業D講,係好有效率),兩個方法,直接買5年,同3+2方案,到期嘅收益都應該一樣。


所以,我地可以用數學計到,3年後再買果張2年期債券嘅孳息係2.66%,明顯低過而家2年期孳息3.24%,即係話市場預期3年後,利息會減返。


當然,市場運作好複雜,以上只係講左其中一個簡單機制,仲有好多其他影響不同年期孳息高低嘅因素,例如風險溢價、流動性溢價等等。之後再講。