保單作爲優等資產


我成日話,做呢行,要戒成日話口才話術,要做成生意,唔係要氹人落叠,係應該真係有一個方案可以幫到客戶解決問題,更有效率運用財富。今日就想講下一個例子。


社會上面有一個其實幾錯嘅概念,如果金融從業員叫上年紀客戶(例如65歲以上)買產品,就一定係呃人,好無道德。但其實,老年客戶一樣需要理財,唔通擺曬D錢响銀行賺唔到利息,坐食山崩咁樣最好?


最緊要係符合客戶風險偏好(通常比較低),照顧理解能力可能開始衰退呢個情況,就完全無問題。於是,儲蓄保險可能好適合,起碼比介紹D老友記去買咩野退休收息股票好,賺幾個Percent派息,但一個熊市唔見三十幾個Percent。


啱啱有個Team Member同我講,政府有一個長者生活津貼,每個月有3,915,如果兩公婆,一年總共就有93,960,唔大唔細都係一筆錢,而且係政府福利,攞都係合情合理。


但就有一個資產審查,如果兩公婆,資產超過56萬就唔合資格。香港好多人,唔係高净值家庭,1千萬就無,但中等階層退休人士,自主物業以外有百零二百萬退休老本都好正常。如果咁,就唔合呢個津貼計劃嘅要求。


但係,計劃裏面又講明,資產,“保險計劃的現金價值則不包括在內”,即係話,如果個百零二百萬係銀行存款,或者咩野收息股票,就真係要如實申報,超額就無得攞個津貼。但如果將D錢買份保險,一樣收下年息,只係留返四、五十萬存款,應付生活開支,咁就完全過到資產審查。


而且,要記得,呢個唔係呃福利,係政府明文寫出黎嘅規矩,你根據規矩去建議客戶有效配置資產,係100%合法合理。


而適合老友記嘅儲蓄保險,當然唔係要供好多年先回到本,或者先顯出效力果D。應該係一筆過繳清,或者兩三年繳果D,然後供完就即刻可以每年攞錢,例如呢期好Heat果隻每年2%保證加2%非保證,總額每年4%。


仲要第二年開始已經有90%以上保證本金返還,隨時果四、五十萬存款用曬,要攞錢出黎用,都好方便。


儲蓄保險,尤其係有保證同快回本果類,風險其實都唔係高存款好多,一定低過股票。如果已經留左成四、五十萬做中間緩衝,應該都係好合理嘅配置策略。


幫到個客有效配置,同樣嘅錢,做到更多嘅野,呢D咪叫財富顧問。